نظم - تقسیم کا عذاب بنام عبدالعلیم خان

 وہ خوشبوؤں کا  شہر  وہ  مَہکار  کا  وطن

ہوتا  تھا  اُس  سے آنکھ  ملا کر خَجِل  چمن

                اُس کی فضاء میں جَذب دُعاؤں کا اثر تھا

         شامل   حیات   بخش   ہواؤں کا  تھا   اثر

نفرت کی آندھیوں نے لیا جب  حِصار  میں

پھر گویا  لوگ  رہ   نہ  سکے  اختیار  میں

                نعرے  ہوئے  بلند کہ تقسیم  ہو  زمیں

         اب اور ساتھ ساتھ رہیں  ہم، نہیں نہیں

بازار گرم ہو گیا پھر  کُشت  و  خون  کا

لگتا  تھا  جیسےعام ہے دورہ جنون   کا

                یادیں تھیں جس کی خاک میں عمرِعزیز کی

         تنگ آکے ایک دن  وہ  زمیں چھوڑنی  پڑی

ماہ   و  نجوم   جتنے  تھے  عبدالحکیم  کے

بے گھر ہوئے کچھ  ایسے کہ دُرّ ِ یتیم  تھے

         ایسے میں دستِ شفقت رمضان مل گیا

         مُرجھا رہا تھا دل کا غنچہ  وہ کِھل گیا

گو راستے میں چھوٹے بڑے  حادثات تھے

عبداحفیظ  ماموں  مگر  اُن  کے  ساتھ تھے

        ہمراہ   باؤجی  کے  تھے  بھائی  سلیم  بھی

         دونوں  کے دل  تھے مرکزِ اُمید و بیم   بھی

تصویر سے میں  گرد  اُٹھاؤں عیاں کروں

اسلاف کے دُکھوں کا کہاں تک بیاں کروں

         اک ایک کرکے ہم سے وہ سب دور ہوگئے

         جا  کر حدودِ  ملکِ عدم   میں  وہ  سو گئے

غوری کی یہ دُعا ہے کہ حق مغفرت کرے

اُن  کی  لحد  میں  نُور،  خدا ہر جہت کرے

٭٭٭٭٭٭

نوٹ:         خوشبوؤں کا شہر –  پٹیالہ ہندوستان میرے والد صاحب کا وطن

                عبدالحکیم –  میرے دادا جان

            رمضان –  میرے والد صاحب کے نانا جان

         عبدالحفیظ –  میرے والد صاحب کے ماموں

        باؤجی –  ہم سب اپنے والد صاحب کو باؤجی کہتے ہیں