غزل - سرفروشان وطن

حامل جو چارہ ساز تھے عقلِ سلیم کے

حرمت کے آشنا تھے،  شناسا  گلیم کے

                 اُن میں نمایاں اِک ابوالاعلی  کا نا م ہے

                 احساں ہیں اُن کی ذات پہ ربِ کریم کے

آساں اُنھوں نے کر دیا قرآن کی فہم کو

شارح تھے  وہ کتابِ خدائے رحیم کے

                 عامر  عزیز بھٹی  و  راشد اور امتیاز

                 یہ سرفروش بیٹے ہیں خاکِ عظیم کے

جنرل ضیاء نے پایا شہادت کا مرتبہ

حقدار  ہو گئے  وہ  بہشت ِ نعیم  کے

                 اک  فتنۂ   نفاق  کے  ایمل   ہوئے  شکار

                 لمحے گراں تھے رمزی پہ اُمید و بیم کے

ذہنوں میں گونجتی ہے صدائے صلاح الدین

اقوال  دل  پہ   نقش   ہوئے   اُس  حکیم کے   

 

                 زر دار  سے  تو صرفِ نظر کر لیا گیا

                 مفلس  حدف  رہیں ہیں عذابِ جحیم کے

یوں کیمپوں میں رہنے پہ مجبور ہیں اسیر

دن رات جس طرح سے بسر ہوں یتیم کے

               غافل ہیں اُن کی سمت سے اربابِ اقتدار

                        حقدار ہیں وہ لوگ تو لطف ِ عمیم  کے

غوری کی یہ دُعا ہے وطن کی حدود میں

فصل ِ بہار لائیں  یہ  جھونکے نسیم  کے

٭٭٭٭٭

نوٹ: ابوالاعلی – مولانا  سید ابوالاعلی مودودی صاحب

        عامر – میجر ریٹائیرڈ محمد عامر

         عزیز بھٹی – میجر محمد عزیز بھٹی شہید

         راشد – سیکواڈرن لیڈر راشد منحاس شہید

        امتیاز – برگیڈیئر  ریٹائرڈ  امتیاز احمد

         جنرل ضیاء – جنرل محمد ضیاء الحق شہید ملت

        ایمل – ایمل کانسی

         رمزی – محمد یوسف رمزی

        صلاح الدین – تکبیر رسالے کے ایڈیٹر

         حکیم – حکیم محمد سعید شہید

         زردار – آصف علی زرداری

        اسیر – بنگلا دیش میں کیمپوں میں رہنے والے

                          پاکستانی لوگ